الفكرة الأولى:

الحملة القومية لتنضيف الشوارع الفرعية. نجي fe منطقة مثلاً و نحصر عدد الشباب إلي فيها, و نجيب “sponsor” يدفع تمن أفرولات و مكانس و جرادل و الصفايح و أكياس زبالة. و نجي تالت يوم جمعة من كل شهر و الشباب ينزل و ينضاف الشوارع, إلي هم عايشين فيها, و يبقى نضفنا البلد ظاهرياً (عقبال النفوس كمان) و خلنا الشباب يعمل حاجة مفيدة في وقت فراغه. و elsponsor ياخد جزء من المنطقة يحط فيها إعلانات ليه.

الفكرة التانية:

الحملة القومية لدهان البيوت. نجي في كل منطقة و نلم تبرعات و نجيب “sponsor” يشتري فرش دهان و بويه و أفرولات, و نجيب شباب المنطقة يدهن عواميد النور, الأسوار, البيوت, المطبات الأرصفة. و elsponsor ياخد جزء من المنطقة يحط فيها إعلانات ليه.

الفكرة التالتة:

 كل شاب يعرف في حاجة يخصص يوم من وقته إنه يروح المدرسة إلي في منطقته, يفهم و يعلم ال ولاد و البنات الصغيرة إن الواحد ممكن يكون ناجح من غير مايكون لعيب كرة أو ممثل أو ممثلة أو حتى رقاصة!

الفكرة الرابعة :

 نضافة الجوامع we الكنائس. الشباب يمسكو جوامع و كنايس المنطقه ينضفوها. عشان الناس إلي رايحة تعبد ربنا تكون مستريحة و بتصلي في مكان نضيف و مريح.

الفكرة الخامسة:

نزرع البلد ده. نلم تبرعات لتشجير الأحياء. و الشباب هما إلي يبقى مسؤلين عن زراعة و سقاية الشجر دة.

الفكرة السادسة:

 تشجيع الشباب على التصويت في الإنتخابات, كل شاب لازم يروح ياخد البطاقة الإنتخابية بتاعته من القسم و يحرص إنه يروح يدلو ب صوته لل مرشح إلي هو عايزه و شايف إنه هيفيدوه و يفيد المنطقة.

الفكرة السابعة:

 تشجيع الشباب إنه يمارس الرياضة, ممكن في كل محافظة كل ٣ شهور نعمل ماراثون الخير, الناس تجي تدفع 5 LE و هتاخد تيشرت و عليه رقم, و نعمل سباق طوله 42.5 km زي ال ماراثون إلي بجد, ونجيب sponsors و اللاذي منه و نقفل حبة شوارع في البلد و على الزحمة مش هتفرق كتير ماهي خربانة خربانة إلي هو خط سير ال ماراثون, و العائد بتاع ال ماراثون دة يروح ل الناس إلي مش لقية ولا لبس ولا أكل.

Happy Eid ElAdha To you All. God Willing we will meet next year at Arafaat.

ماتنسوش ناصيبى فى اللحمة

Don’t Forget My Meat

في الحلقة الأولى: قلت إن البنات هي الغلطانة.

في الحلقة التانية: بصراحة قلبت هزار!

في الحلقة التالتة: قلت إن الأهل هم السبب.

و دلوقتي جة الدور على الشباب عشان أتكلم عليهم شوية.

ازاي الشباب بيختار البنت !!؟

أي شاب بيتمنا إنه يتجوز ملكة جمال الكون، و فاكر نفسه إلي محصلش و عايش في وهم إن أي بنت هيتقدملها هتكون مش مصدقة إنه اتعطف عليها و عبرها.

طب بذمتك دة كلام؟، طبعاً دة غلط، طب تعالى إنت كدة فكر معايا لو إنت عايز ملكة جمال مش من حقها انها تكون عاوزه ملك جمال، طب إنت واحد بكرش و مبتلعبش رياضة و مبهدل في نفسك شايف نفسك على ايه؟ كتك نيلة !

الشباب يتحمل جزء كبير من مسؤلية الفشل إلي فيه المجتمع؛ بجد شباب معندهش طموح نهائياً و كل إلي فالح فيه إنه يتكلملو كلمتين إنجليزي و ياخد الفلوس من بابا ولا ماما و يعد يتسرمح بالعربية في الشوارع بدون هدف طب دة كلام يرضي حد؟ طبعاً لأ؛ و في الأخر عايزين الشاب دة يشيل مسؤلية! طب ازاي؟

بالنسبة لي الشباب دول يروح في داهية ينيل إلي ينيلوه بس المشكلة انهم سوأوا سمعت بقيت الشباب، فبقى الشباب بيتبصله دايماً إنه غير مسؤول و الشباب الكويس بجد يتظلم.

طب تعالوا كدة نتكلم شوية عن ازاي تختار البنت.

سيدنا محمد عليه الصلاة والسلام قال لنا ازاي نختار البنت إلي نتجوزها

“تنكح المرأة لأربع: لمالها، ولحسبها، ولجمالها، ولدينها، فاظفر بذات الدين تربت يداك”

طب أنا مين عشان أفسر الحديث دة، أنا مش معنديش علم أو معرفة اني أقل رأي. لكن! من هي ذات الدين؟ في مجتمعنا إلي احنا فيه بتلاقي من كل شكل و من كل نوع! طب إنت شفت واحدة و عجبك هتعرف ازاي انها ذات دين؟ لابسة حجاب؟ مبقاش للأسف شرط للإحترام (إلا من رحم ربي). أنا عايز حد يقول لي أعرف ازاي ذات الدين؟ أنا مقتنع إن معظم البنات الموجودة في مصر يعرفو دينهم كويس جداً، ماهو حاجة من اتنين يا إما أنا مبشوفش! يا إما هما مستخبيين !!

بس برده عشان مخرجش عن الموضوع بص يابني إنت و هو دور على البنت المحترمة، حط مواصفاتك بما يتفق مع الشارع (بمعنى شوف الدين بيقول اه و امشي وراه) مش عيب انك تطلب واحدة جميلة بس لازم بقى الشباب يبطل الأنعرة الكدابة و الوهم إلي هما فيه.

بص و دور في حدود امكانياتك و مستواك الإجتماعي و المادي.

مش كدة ولا ايه؟؟؟

أنا مستني تعليقاتكم عشان أعرف رأيكم في إلي أنا قلته دة !

البنات بتتنك عشان هي خيفه من المجهول طب فهمناها. طب و الأهل؟

أنا عارف اني قلت اني هاتكلم عن العفش والتشطيب بس لاقيت إن دة مش مهم في حاجة أهم؟ و هي العائلة!

الحلقة التالتة: الأهل!

أنا نفسي كل ولد يروح يسأل ابوه و أمه لما جم يتجوزوا كان معاهم كام و كان مستوى معيشتهم أيه ،في الغالب هيقولوا ربنا كرم و رزقنا من عنده و إتجوزنا و كله مشي بسلاسة (في الغالب!).

و ياريت البنات تروح تسأل أبوها نفس السؤال، في الغالب هيرد نفس الرد.

و هنا السؤال يطرح نفسه، ليه الأب (بالذات) و ساعات الأم لم يجي لبنتهم عريس بيقعدوا يقطعوا في فروته و يقعدوا يتتنكو عليه ؟ عشان هما خايفين الواد يطلع صايع و يمرمط البنت معه و يصبحها بعلقة و يمسيها بعلقة!؟

يا رجل و ياسيدتي الجواب بيبان من عنوانه لو الواد صايع و قليل الأدب بيبان من الأول و لو كان محترم بردوا بيبان.

طب إنت يا عام الحج لم رحت تتقدم لمراتك حماك عمل إيه معاك؟ هل خنق علق ذي ما أنت بتعمل دلوقتي؟ولا اداك الفرصة و وثق فيك؟و ساعدك و شجعك؟

طب دة لو كان خنق عليك يبئة مطلعهوش على الواد الغلبان إلي جاي يتقدم لبنتك، و لو كان ساعدك و وثق فيك يبقى ساعد الواد اللي جيلك ده! صح ولا أنا غلطان؟

ده أول نقطة ! تاني نقطة موضوع مستوى المعيشة مع احترامي الكامل إنت (و كلامي لأبو البنت) إنت أخدت كم سنة عاشاً توصل للمستوى ده؟ أعتقد مش أقل من ١٠ – ١٥ سنة، طب عايز واد متخرج من سنتين ولا تلاتة يعيشها في نفس المستوى من الأول طب دانت كدة بتظلمه، أقلك إنت تقلق لو الواد شايف انه معندهوش طموح و هو أصلاً بروطه قلته أحسن!

يا جماعة أنا أحب ادعوا كل أب و أم انهم يحكموا عقلهم و يتقوى الله في الواد إلي جي يطلب أيد بنتهم.

و أحب اني أفكرهم بحديث سيدنا محمد صلى الله عليه وسلم “إذا أتاكم من ترضون دينه وخلقه فزوجوه”

الحديث مقلش معاه ١٠٠ ألف جنيه و شقة ٣ أود و صالة و ٢ حمام، و عنده عربية. كل إلي قاله الحديث إن يكون دينه صحيح! البني أدم إلي بيحافظ على دينه لازم يكون طموح و عند هدف في حياته.

فيه رجاله بيصعب عليه إنه بعد ما صرف دم قلبه على تعليم البنت و تربيتها ييجي واحد ياخذها و كمان يعيشها في مستوى أقل من إلي هي فيه دلوقتي طب معلش عندي سؤال تاني! مش ده إلي حصل معاك ليه تقول لأ؟ ماهو الواد لو كويس و عايز يكبر هيشتغل بأيده و سنانه عشان يعيشها في مستوى أعلى، الجواز مش فلوس و بس ده حياه بين اتنين كفاح متبادل.

يا ريت بس حد يقولي لو أنا فكر نفسي في يوتوبيا و نوع البشر إلي أنا بتكلم عليه ده مش موجود.

معظم إلي علقوا على الحلقتين الأولنيين قعد يقولوا في ناس لسة بتشتري رجل طب قول لي هما فين و القيهم ازاي أكلم الدليل و أقول اديني نمرة إلي بيشتروا رجالة؟

في النهاية أحب أقول إن فيه أهالي عايزين مخهم يتفرمت عشان يبتدو يفكروا صح. لكن من رحمة ربنا على شباب البلد ده إن في ناس لسة بتشتري رجالة! (على ما أعتقد!)

برده عشان أقول الحق في ولاد ولاد ……. ببساطة مش بتوع شيل مسؤلية هما دول إلي جيبين الشباب لورا.

إيه رأيكوا بقى؟؟

أنا إن شاء الله هاتكلم في الحلقة الرابعة عن ازاي الشباب بيختار البنت !!!

أخر نقطة:

في ناس كتير قالت لي إن الحلقة التانية قلشت مني، أنا اعترف بذلك بس أنا قلت اني هاكتب حاجة إختراع!

و كمان جالي تعليق إن الحلقة قصيرة عن أول حلقة بس ده مش بأيدي ببساطة إلي في دماغي بيطلع على الكيبورد عدل! يطلع في سطرين يطلع في صفحتين مش فارقة معايا! المهم الفكرة توصل ولا إيه رأيكوا؟!

سلام مؤقت!

comment

على الحلقة الأولى سواء إتفق معي ولا لأ؟ بجد أنا في حاجات كتير أنا مفهومي عنها اتغير خاصةً موضوع تناكت البنات و اكتشفت إن الولاد برده بتيتتانك نبقى نيجي للموضوع ده بعدين.

ثانياً أنا أحب اني أقول إن إلي أنا بكتبوه ده مش تجربة شخصية، ده عصاره إلي بسمعه من أصحابي عن أصحابهم و عن تجربتهم.

دلوقتي جه وقتنا مع الحلقة الثانية.

زي ماقلت قبل كدة إن الفرح و الخطوبة ملهمش لازمة بس الفشخرة و المنظرة بتاعة العائلات (في الغالب بتكون عائلة البنت) بتحتم انهم يتعملو.

يبقى لازم نشوف حل للموضوع ده.

أولاً الخطوبة هيحصل اه لو العائلتان يقعدو مع بعض و يلبس دبل و خلصنا على كدة و نجيبلنا تورتتين و دستتين جاتوه و إززتين بيبسي و خلصنا على كدة، أو لو عايزين زفر و لحمة و كدة العريس يأخذ العائلتان و على أي مطعم محترم و يعدو ياكلو اخرها هيكون ألفين جنيه !

أدينا خلصنا من الخطوبة.

نيجي على كتب الكتاب ده باءة أنا معنديش أي إعتراض عليه خالص، هي القاعة التمام بتاعت مسجد الشرطة و صينيتين الشكولاتة و حبة العصير و الماء

اخرها ده كمان ألفين جنيه.

أدينا خلصنا من كتب الكتاب.

ندخل بقى على أس المصايب الفرح!

الموضوع بسيط أوي. أنا عندي حلين ليه

أول حل:

بلاها فرح! العريس يأخذ العائلتان و يطلع على نفس المطعم بتاع الخطوبة وأدي ألفين جنيه كمان، و بعد كدة ياخد عروسته و على شهر العسل. و ممكن كمان عشان ياخدو ثواب في أول حياتهم العريس يروح يجيب عجل و يدبحو و يديه لمطعم على ادو و يعمله وليمه في أي جمع و يعزم أصحابه و أي حد نصيبه إنه يكون موجود ساعتها. و أهو يكونو أكلو الناس بدل الأكل إلي بيكون موجود في الفرح هى مش فكرة بردو!؟ العجل بتسويته يعملو خمس تلاف جنيه

و لو مش عجبك موضوع الجامع ده روح أجرلك أي قاعة في أي نادي نص كوم بألف ولا ألف ونص و قعد الناس على كراسي و حاجة فولالي.

كده أخرك ستلاف جنيه.

تاني حل:

مش انتو عايزين فرح يبقى نعمل فرح بس حاجة إختراع.

لازم أولاً نشوف الفرح عبارة عن ايه؟

١- زفة: نعملها في مدخل العمارة.

٢- العرسان بيتصورو مع الناس: خلاص نأجر ستديو تصوير و نقول للناس يجو يتصوروا مع العرسان و نقعد العرسان على بتاعة زي بتاعة الكوشة و حته

photoshop

نركب كوشة على الصورة و خلصنا.

٣- الكتاب إلي بيعدوه على المعازيم عشان يكتبوا فيه كلمتين يبقى في نفس وقت الصور.

٤- البوفيه: فاكرين الفكرة إلي في أول حل حل زي الفل!

٥- الرقص: العريس ياخد عروسته على أي ديسكو و يروح يرقصوا هناك! و لو المعازيم عايزين يرقصوا هما كمان يبقى هما كمان يدخلوا ديسكو، و أصحاب العريس و صاحبات العروسة إلي عايزين يرقصوا ندخلهم مع بعض

couples

و جوا كل واحد يروح لحاله !

كدة أخرك ستلاف جنيه. حاجة زي الفل.

طب مدام الموضوع له حلول يبقى اه المشكلة؟ لو البنت وافقت على الحلول ديه أمها مش هتوافق. ليه؟ عشان بنت عمها و بنت خالتها و بنت الجيران و صاحبتها و على ما شاكل ذلك!

شفتوا ازاي حلول عملية جداً و مقبولة! ايه رأيكوا يا بنات؟ و إيه رأيكوا يا ولاد؟

في الحلقة التالتة هنعرف ازاي ممكن نوفر حبة كمان في مصاريف الجواز خاصةً العفش و تشطيب الشقة. حد عنده أفكار؟

أنا عارف إن الموضوع شائك أوي بس يلا توكلنا على الله.

أنا هحاول احلل ليه الشباب في مصر مش عارف يتجوز.

ده وجهة نظري الخاصة. فإذا مكنتش مهتم اقفل الصفحة.

أولاً أنا إنسان بسيط, مصري(قدر الله و ما شاء فعل), إتخرجت من كلية الهندسة شغال في واحدة من أكبر شركات ال IT في مصر, مرتبي كويس (الحمد ل الله). كلام جميل طب إيه المشكلة

المشكلة بسيطة أوي, عايز اتجوز, لكن مش عارف, أنا هحاول اني أقول لكم ليه مش عارف اتجوز, مين السبب! و حبة إقتراحات ل الولاد وال بنات في مصر.

هحاول اني اكتب الموضوع على كذا مرة و مش هكدب عليكو حسب ارائكم هقرر هكمل ولا لأ!

تحذير: البنات و الأمهات ميزعلوش مني.

الحلقة الأولى!

أول سبب من الأسباب هو تناكة البنات، الواحدة من دول تقابلها تتنك عليك بطريقة مستفزة فاكرة نفسها بنت اللي بارم ذيله.

المهم الواحدة منهم تعد ترفض في شباب ذي الورد مفهمش عيب.

مرة تقول صغير عايزة واحد كبير و لما يكون كبير تقول عايزة واحد صغير !

بالمناسبة أنا معنديش إعتراض خالص هي حرة تعمل اللي هي عايزاه بس اتقو الله في الشباب، ده انتو المفروض تحمدو ربنا إن بيجيلكو عرسان محترمة.

بصو باءة عشان أنا بجد مفؤع أوي. رسالة للبنات أنا بحزركو لو مبطالطوش تناكه هتعنسو و مش هتلأو بنئادم يعبركو.

طبعاً كالمعتاد ده لا ينطبق على كل البنات في منهم قلة دمغهم نضيف و بيفكرو بعقلانية.

تاني سبب من الأسباب هو الفلوس تعالو نحسبها

سيبكوم من ثمن الشقة و تعلو نحسب بقية الحاجة

العفش بتاع تلتين ألف جنيه و الأجهزة ب بتاع عشرة كمان أدي أربعين

تشطيب الشقة بتاع تلتين هتشطب الشقة برجلك!

دخلنا في سبعين ألف دول مرتب سنتين و نص تقريباً

طب من فين؟

و بعد كدة تلاقيهوم يقولو لك شبكة بخمستاشر ألف عشان متكونش أقل من بنت عمها ولا بنت الجيران ولا صاحبتها طب من فين.

خلينا واقعين الحج الوالد كفاية عليه مصاريف الدنيا زائد هو هيتعب معانا في إنه هيجيب لنا الشقة.

و بعد كدة ندخل على الخطوبة والفرح، طب سيبونا من الخطوبة أبو العروسة هو اللي هيشلها. طب والفرح؟ ده لوحدوه بتاع ٢٠ ألف

وصلنا كم؟ عملنا كدة بتاع ٩٠ ألف ده غير كتب الكتاب و مصاريف المأذون!

يعني من الأخر ندخل في ١٠٠ ألف جنيه

أجيب من فين، و أي شاب يجيب من فين؟ الحل نسرق !

الحل نصوم!!!

بصو باأة أنا عايز اتجوز! لو حد عنده عروسة يقول لى! المواصفات اللى انا عايزها هتيجي في حلقة تانية

بصراحة أنا زهقت من الكتابة و اكتأبت من اللي كتبته.

في الحلقة الثانية تحليل كامل (من وجه نظرى) لموضوع الفرح و ازاي ممكن نستعيض عنه بأفكار منها حاجات اختراعي ومنها حاجات شفت أصحابي بيعملوها.

أنا عارف اني فتحت على نفسي نار. يا رب أكون قدها.

إيه رأيكو بقى؟

أكمل ولا لأ؟

سامحوني على أسلوب الكتابة, ده ببساطة اللي موجود في مخي!

Happy Birthday ya Za3eeeeeeem